מיטוואך פ' חוקת • ו' תמוז תשפ"ה | בחצרות הקודש
די וואך איז אפגעהאלטן געווארן א געמיינזאמע אסיפה בשבת אחים גם יחד, כ"ק האדמורי"ם לבית ראחמיסטריווקא, וועלכע האבן אינאיינעם דן געווען פארשידענע ענינים העומדים על הפרק, און צווישן זיי איז ארויפגעקומען על שלחן מלכים די בעפארשטייענדע הילולא קדישא תניינא פון מר אביהם הגדול כ"ק אדמו"ר הרה"ק מראחמיסטריווקא זצ"ל בעל "אמרות טהורות" וואס געפאלט דעם קומענדיגן ער"ח אלול.
היות די יארצייט קומט אויס אויף א שבת, איז איינשטימיג ארויס די החלטה דורך אלע ממשיכים האדמורי"ם, צו מעריך זיין א געהויבענעם "שבת התכנסות" בראשות אלע רבי'ס.
ווי נאר די ידיעה איז ארויס מבית המלכות, האבן זיך ספאנטאן אריינגעווארפן די עסקנים פון חצר הקודש ראחמיסטריווקא, אנצוגרייטן דעם גרויסארטיגן שבת וואס אנטשפרעכט צו צונויפברענגען אלפי חסידי ראחמיסטריווקא מכל מקומות מושבותיהם, וואס וועלן קומען וויילן באתרא דבעל הילולא, אין שטאט בארא פארק, און וועט אפגעראכטן ווערן בבית מדרשו של רבי אינעם ביהמ"ד הגדול ראחמיסטריווקא, וואס שטייט בנשיאות בנו הגדול ממלא מקומו כ"ק האדמו"ר מראחמיסטריווקא שליט"א, וואו מ'וועט זיך אינאיינעם ווארעמען בצלם של ממשיכי דרכו בקודש, און זיך מחזק און משנן זיין משנתו הטהורה פונעם גרויסע בעל הילולא.