דינסטאג פ' אמור • ט"ו אייר תשפ"ה | בחצרות הקודש
תנו כבוד לתורה, כי היא לנו עוז ואורה! עס איז נארוואס באשטעטיגט געווארן אז צום 4'טן יאר נאכאנאנד וועט היי-יאר ווידעראמאל אפגעצייכנט ווערן א הייליגע מאניפעסטאציע פון הרמת כבוד התורה, ביים מעמד אדיר ונהדר "אדירי התורה", וואס וועט איינזאמלען א לגיון רבתי פון צענדליגער טויזנטער הוגי ועמלי תורה פון די גרעסטע תורה-צענטער אין אמעריקע, ביהמ"ד גבוה דלעיקוואד, מיט'ן ציל אפצוגעבן דעם פאסיגן יקרא דאורייתא און כבודה של תורה ותומכי', אין שפיץ פון מרנן ורבנן גדולי ראשי ישיבות פון אמעריקע און ארץ ישראל.
דער היי-יעריגער "אדירי התורה" וועט פארקומען אויפ'ן זעלבן פלאץ פון די ביז יעצטיגע מעמדים, אינעם גיגאנטישן וועלס-פארגאו ארענע אין פילאדעלפיע, וואס פארמאגט שווערע טויזנטער זיץ פלעצער צו אקאמאדירן די מאסיווע פלייץ פון טויזנטער לומדי תורה, רבנן ותלמידיהון.
דער מעמד וועט צוגלייך ארויסהייבן די פעולות נשגבות פון די תומכי התורה, און די אויסטערלישע דערגרייכונגען וואס מ'האט באוויזן די לעצטע עטליכע יאר, צו הייבן די תמיכה פאר די לומדי תורה מיט דראסטישע פראצענטן, ווען דעם לעצטן חודש אייר איז געווארן פארפולקאמט פולע פיר יאר זינט עס האבן אנגעהויבן ארויסגעגעבן ווערן די נייע "אדירי התורה" טשעקס, וואס ענטהאלט פילפאכיגע העכערע תמיכה פאר די טויזנטער לומדים, וואס זיי האבן ערהאלטן צייטליך אין לויף פון די גאנצע פיר יאר, אן איבעררייס, און בלויז די לעצטע יאר איז פארטיילט געווארן דורכ'ן קרן אדירי התורה די אסטראנאמישע סומע פון 73 א האלב מיליאן דאלאר, ערגענצנדיג א טאטאל פון א מעגא 236 מיליאן דאלאר אין די גאנצע 4 יאר.
פארגאנגענע וואך איז דער בריח התיכון און הויפט שטיצער פונעם פראיעקט, דער בארימטער תורה-פילאנטראפ ר' אליעזר שיינער הי"ו, געווען אויף באזוכן בבתי גדולי ישראל אין ארץ ישראל, מקבל זיין ברכת הקודש צום גרויסן מעמד.
דער מעמד "אדירי התורה" וועט פארקומען דעם קומענדיגן י"ב סיון, זונטאג בהעלותך, בהתאסף ראשי עם יחד שבטי ישראל לומדי תורה באלפי', און דעם קומענדיגן זונטאג בהר-בחוקתי וועט זיך עפענען די טיקעט-פארקויף צענטערן פאר'ן אלגעמיינעם ציבור וואס וויל קומען מיטלעבן די היסטארישע מאורע.
אויסער די גדולי ישראל וראשי ישיבות פון אמעריקע וואס וועלן מפאר זיין בראש, איז ערווארטעט בהדרת כבוד די ערשיינונג פון אחד המיוחד מגדולי ראשי ישיבות אין ארץ ישראל, וואס וועט קומען צופארן ספעציעל צום מעמד און אויפטרעטן אלס "אורח הכבוד" בשבח עמלי תורה ותמכין דאורייתא.