מאנטאג פ' שלח • כ' סיון תשפ"ה | בחצרות הקודש
בילדער קרעדיט: JDN
אין א בחינה פון 'שבת אחים גם יחד', איז היינט נאכמיטאג אפגעראכטן געווארן אן אייגענארטיגע שבע ברכות, צום סיום שבעת ימי המשתה לרגל דריי חתונות ביי די ברודער כ"ק האחים האדמורי"ם מתולדות אברהם יצחק, תולדות אהרן, נחלת אהרן און הגה"צ ראש ישיבת תולדות אהרן שליט"א, וועלכע האבן חתונה געהאט בו ביום די פארלאפענעם וואך דינסטאג.
צוליב די אומשטענדן איז די שמחה אפגעראכטן געווארן בזעיר אנפין, בלויז מיט די באטייליגונג פון די בני משפחת המלוכה די צאצאים פון הרה"ק בעל דברי אמונה מתולדות אהרן זצוק"ל, בביתו נאוה קודש פון דעם גדול האחים כ"ק אדמו"ר מתולדות אברהם יצחק שליט"א.
בראש השולחן זענען געזעצן די דריי חתנים ווען לימינם זיצט כ"ק אדמו"ר מתולדות אהרן שליט"א און לשמאלם כ"ק אדמו"ר מתולדות אברהם יצחק שליט"א.
במשך די סעודה האבן די ברודער פארברענגט בשבת אחים, און דער יונגסטער ברודער כ"ק אדמו"ר ממבקשי אמונה שליט"א האט אויפגעטראטן מיט א רירענדע דרשה, ארויסברענגענדיג די גרויסע זמן אין וואס מ'געפונט זיך אצינד, ווען אלע ברודער זיצן אינאיינעם באהבה ואחוה כשתילי זתים סביב לשולחן, וועלכע איז זיכער מעורר געוואלדיגע השפעות ממעל.
אזוי אויך האט זיך באטייליגט ביים שמחה כ"ק אדמו"ר ממאחנובקא בעלזא שליט"א, וועלכע איז א זיידע פון איינע פון די חתנים, און כ"ק אדמו"ר מסקולען ירושלים שליט"א.
מיטן בענטשן האט דער בעל האכסניא פון די שמחה האדמו"ר מתולדות אברהם יצחק שליט"א מכבד געוועהן די זיידע האדמו"ר ממחנובקא בעלזא און דאן צוטיילט די שבע ברכות צווישן די ברודער האדמור"ים והרבנים שליט"א. די שמחה האט זיך געשלאסן מיט א שיינעם מחול לצדיקים לכבוד שמחת חתן וכלה.