זונטאג פ' צו • ח' ניסן תשפ"ה | בחצרות הקודש
בילדער קרעדיט: אברומי ווייס, JDN
אין א געהויבענע שטימונג האבן חסידי סקווירא אין בארא פארק געפייערט די הכנסת ספר תורה וואס איז אריינגעגעבן צום ביהמ"ד תולדות יעקב יוסף דחסידי סקווירא אויף די זיבעצענטע עוועניו אין בארא פארק, געשריבן געווארן בשכם אחד דורך די אלע מתפללי ביהמ"ד, ובראשם דער דיין הקהילה הגה"צ ר' יחיאל מיכל שטיינמעטץ שליט"א בעמח"ס משיב נבונים. בראש החגיגה האבן באשיינט די קינדער פון כ"ק אדמו"ר מסקווירא שליט"א, ובראשם בנו הגדול הרה"צ רבי אהרן מענדיל טווערסקי שליט"א וועלכער האט אריינגעשריבן די אותיות ביים מעמד סיום כתיבת האותיות אין שטוב פונעם סקווירא דיין שליט"א, און דאן מיטגעהאלטן די תהלוכת הספר און די הקפות אין ביהמ"ד. באנאכט ביים סעודה לגמרה של תורה האט זיך משתתף געוועהן הרה"צ רבי יצחק טווערסקי שליט"א וועלכער האט איבערגעגעבן די ברכת הקודש פון מר אביו האדמו"ר מסקווירא צום מעמד.