זונטאג פ' צו • ח' ניסן תשפ"ה | בחצרות הקודש
בילדער קרעדיט: שלומי טריכטער, JDN
דעם ערב שבת קודש ו' ניסן איז אפגעצייכנט געווארן די יומא דהילולא רבה פון הגה"ק בעל שומר אמונים זי"ע, "אהרן קדוש השם" וועלכער האט באלויכטן די וועלט מיט זיין תורה וקדושה, און עבודת התפילה. לרגל די יארצייט האבן די אייניקלעך האדמורי"ם שליט"א אפגעראכטן די שולחנות הטהורים במקהלות עם רב.
בצל הקודש פון נכדו הגדול ומ"ד כ"ק אדמו"ר מתולדות אברהם יצחק שליט"א, איז די רבי שליט"א אריינגעקומען צו מעריב בליל ההילולא און יורד געווען לפני התיבה, דערנאך האט די רבי אפגעראכטן די שולחן הטהור סעודת הילולא רבתי ביי וועלכן די רבי האט משמיע געווען דברות קודש ארומרעדנדיג איבער די גרויסקייט פונעם טאג פון א יארצייט פון א צדיק, און מרחיב געווען איבער די עבודת הקודש פונעם זיידן די בעל הילולא וואס איז געווען שלא כדרך הטבע, און איבער די חוב זיך מדבק צו זיין בדרכיו הטהורות און לערנען אין זיינע הייליגע ספרים ווי ער האט מנחיל געווען יסודות העבודה והאמונה, די רבי האט ממשיך געווען מיט דברי הכנה ליו"ט פסח און דברי הדרכה בשמירת עיניים, און מסיים געווען בברכות קדשו לרוב בזכותו של אותו צדיק.
נאכן טיש איז די רבי ארויסגעפארן צום הר הזיתים ווי די רבי האט מתפלל געווען קעגן איבער דעם ציון הק', און שופך שיח געווען א תפילה חרישית לישועת הכלל והפרט, פרייטאג צופרי האט דער רבי געדאוונט שחרית פארן עמוד און דערנאך אפגעראכטן א שולחן לחיים לרגל האי יומא רבה.