מיטוואך פ' ויקרא • ד' ניסן תשפ"ה | בחצרות הקודש
בילדער קרעדיט: שוקי לרר,JDN
אינעם נאסטאלגישן מעון הקודש פון מרן שר התורה הגאון האדיר רבי חיים קנייבסקי זצ"ל איז די וואך אפגעראכטן געווארן א אייגנארטיגע מעמד הכנסת ספר תורה, דורך די כולל אברכים וואס איז געגרינדעט געווארן באלד נאכן הסתלקות מיט דריי יאהר צוריק, וואו חשובע אינגעלייט בני עליה הארעווען א גאנץ יאהר על התורה ועל העבודה, אין דעם בית הגדול וואו דער גאון האט געוואוינט יארן לאנג ומשם יצאה תורה והוראה לישראל.
דער כולל שטייט בנשיאות בנו הצעיר הרה"ג ר' יצחק שאול קנייבסקי שליט"א, און יעדעס יאהר ערב פסח טוט מען אין די ראמען פונעם כולל, מסיים זיין כל התורה כולה, ווי עס איז געוועהן דער מנהג פונעם שר התורה מידי שנה בשנה.
די ספר תורה איז נתנדב געווארן דורך הנגיד ר' שמואל ווילהעם הי"ו מגדולי תומכי ומחזיקי תורה. די תהלוכה איז באגלייט געווארן דורך א גרויסן ציבור, ובראשם די קינדער פונעם שר התורה. אנקומענדיג צום מעון הקודש אויף די רשב"ם גאס אין בני ברק האט מען אפגעראכטן די הקפות און געליינט די קריאה פון וזאת הברכה כנהוג.
עס האט נאכגעפאלגט מיטן סעודת מצוה וואס האט געדינט אלס דרייפאכיגע חגיגה, בראש וראשון די סעודת לגומרה של תורה, דער סיום כל התורה כולה דורך די לומדי רבני הכולל, און א שבע ברכות לכבוד די חתונה פון די כלה א טאכטער פונעם ראש הכולל הגאון רבי יצחק שאול קנייבסקי שליט"א.
במשך די סעודה איז געהערט געווארן דרשות דורכן בעל שמחה דער ראש הכולל, זיין זוהן הרב יעקב קניינסקי, נאמן ביתו ויד ימינו פונעם שר התורה, הגאון רבי יצחק קולדצקי אן איידעם פונעם גאון און הנגיד ר' שי גראוכער הי"ו – פטרון הכולל.