דאנערשטאג פ' כי תבוא • ט"ז אלול תשפ"ד | בחצרות הקודש
תושבי עיר הבירה לאנדאן און חסידי ואוהדי בית ביאלא בפרט זענען איינגעהילט אין התרגשות זיך גרייטנדיג צו דעם שבת קודש פרשת כי תבוא ווען כ"ק אדמו"ר מביאלא בית שמש שליט"א וועט פראווענען א געהויבענע שבת בקרב חסידיו ומעריציו אין לאנדאן הבירה, צום ערשטן מאל נאכן איבערנעמען די כתר האדמורו"ת מיט קרוב צו דרייסיג יאהר צוריק.
די רבי שליט"א איז צוגאסט צינד אין שטאט לפאר על ראש שמחתו די חתונה פון בנו החתן מיט די כלה בת קדושים א טאכטער פון הגה"צ אב"ד ליעזש ראדוואן שליט"א וואס קומט פאר היינטיגן ליל שישי בקול צהלה ורינה אין שטאט במקהלות חסידים ואנשי מעשה, און אויף דעם שבת כשהשמחה במעונו וועט די רבי פראווען די שבת של שמחה בבית מדרשו פונעם אבי הכלה בית המדרש ליעזש ראדוואן, מיט די באטייליגונג פון א גרויסע ציבור חסידים וואס זענען מיטגעקומען פון ארץ ישראל צו די שמחה, און נאך פילע חסידים ואנשי מעשה תושבי העיר וואס וועלן קומען מיטהאלטן די לעכטיגע תפילות און טישן בלהבת אש אויפן ביאלא שטייגער, און זיך דערווארעמען באש קדושת השבת. פרייטאג צונאכטס 10:30 וועט די רבי שליט"א אפרעכטן דעם שולחן הטהור אשר לפני השם, און בעת רעווא דרעוין 7:30 וועט זיין מנחה און דערנאך די טיש שלש סעודות ברוב עם.
אין די יעצטיגע טעג בזמן שהצדיק בעיר וועט זיין די געלעגנהייט פאר אוהדי בית ביאלא אין לאנדאן והגלילות אריינצוגיין אל הקודש פנימה לקראת די הייליגע טעג, אויך וועט די רבי שליט"א באזוכן בבתי אדמור"י ורבני העיר לאנדאן.
