מאנטאג פ' נצבים • כ"ב אלול תשפ"ה | בחצרות הקודש
בחדוות הלבבות איז פאריגע וואך געפראוועט געווארן אין ירושלים עיה"ק די שמחה הגדולה בבית צדיקים, ווען כ"ק אדמו"ר מביאלא בית שמש שליט"א האט אונטערגעפירט בנו החתן אונטער די חופה, מיט די כלה א טאכטער פון הרה"ג רבי אהרן וואזנער שליט"א זון פון כ"ק גאב"ד זכרון מאיר זצ"ל בעל מחשבת הלוי און איידעם ביי הגאון הגדול גאב"ד לאנדאן שליט"א, די חתונה איז געפראוועט געווארן בשמחה וגיל אינעם מונדיאל זאל אין ירושלים.
ביים קבלת פנים האט זיך אנגעזעהן דאס השתתפות פון הגאון הגדול רבי נתן קופשיץ שליט"א מגדולי רבני בית שמש וועלכע איז ספעציעל אריינגעקומען קיין ירושלים לכבוד די שמחה.
ביים מעמד החופה תחת כיפת השמים איז מכובד געווארן מיט סידור קידושין די פעטער פון חתן הגה"צ רבי שמואל דוד גאלדמאן גאב"ד זוועהיל, עדי קידושין זענען געוועהן הגה"ח ר' ישראל אשר שיינפעלד משפיע בחצר הקודש ביאלא בית שמש, און הגה"ח ר' וועלוול דייטש מזקני החסידים און מו"ץ העדה החרדית. קריאת הכתובה די פעטער הגאון רבי עקיבא וואזנער מו"ץ העדה החרדית, צו די ברכות האט מען אויפגערופן די פעטער'ס הרבנים לבית זוועהיל, און ברכה אחריתא הגאון המקובל רבי משה בוסו שליט"א אייניקל פונעם באבא סאלי. נאכן חופה האט די אבי החתן דער רבי שליט"א אנגעוואונטשן מברכות קדשו לכל העם הנאספים און מען האט זיך ארויסגעלאזט אין א מחול לצדיקים.
במשך די שמחת החתונה האט די רבי שליט"א אויפגענומען בצהלת פנים די פילע געסט וואס זענען געקומען זיך מיטפרייען בשמחתו און אפגעבן ברכת מזל טוב, ובראשם האבן זיך אנגעזעהן אדמורי"ם ורבנים וקרובי המשפחה צווישן זיי האדמורי"ם מזוועהיל, נדבורנא ירושלים, שבט הלוי, ביאלא בני ברק, שידלובצא, ביאלא רמת אהרן, ביאלא פשיסחא, ביאלא ישרי לב, ביאלא פשיסחא הר נוף, סטריקוב ירושלים, לעלוב בראנוביץ, פוריסוב, ווערדאן ירושלים, ברעזשאן, המשגיח הגה"צ רבי בנימין פינקל שליט"א, הגה"צ ראש ישיבת תולדות אהרן שליט"א, הגה"צ רבי שמחה ראבינאוויטש בעל פסקי תשובות, אב"ד סאדיגורא ירושלים, און הרב חיים מאיר רוקח נכד האדמו"ר מבעלזא.
פארן בענטשן האט די רבי מכבד געווען הגה"צ רבי בנימין פינקל שליט"א משגיח ישיבת מיר אויפצוטרעטן לכבוד די שמחה ווי ער האט מעורר געווען זכות אבות דערמאנענדיג פון זיינע זכרונות בצילו פונעם זיידן פון חתן הרה"ק בעל חלקת יהושע מביאלא זצוק"ל.
דאן האט מען צוגעטרעטן צום רעווא דרעווין דער מעמד המצוה טאנץ, בראש וראשון האט די רבי שליט"א אפגעראכטן די ריקודין קדישין לפני הכלה. איידער די רבי איז געטאנצן מצוה טאנץ האט מען געזינגען א ניגון אויף די ווערטער ונפשי תגיל בה' וואס די רבי האט מחדש געווען לכבוד די שמחה, און די רבי איז דאן געטאנצן באש להבה.
דערנאך האט מען אויפגערופן די בני משפחת המלוכה יוצאי חלציו פון כ"ק אדמו"ר בעל להבת דוד מביאלא זצ"ל ובראשם דעם רבינס ברודער כ"ק אדמו"ר מביאלא בני ברק שליט"א און דער שוואגער כ"ק אדמו"ר משידלובצא שליט"א. דערנאך זענען געטאנצן די פעטער'ס הרבנים לבית זוועהיל, די פעטערס האדמו"ר משבט הלוי ואחיו הרבנים, און די מחותן אבי הכלה.
עס איז שוין געווען שפעט ביינאכט ווען די שמחה האט זיך געשלאסן מיט גרויס דערהויבנקייט נאך די מצווה טאנץ פון חתן כלה.
