מאנטאג פ' וזאת הברכה • י'ד תשרי תשפ"ו | בחצרות הקודש
די גאסן פון די אגן האיילות געגענט אין גבעת זאב, האבן מיטגעטאנצן בשמחת התורה ביים גרויסארטיגן מעמד הכנסת ספר תורה צום נייעם ביהמ"ד 'בני היכלא', וועלכע שטייט בנשיאות הגה"ח רבי משה רויטמאן שליט"א ראש ישיבת אוהב ישראל ומשפיע אין מרכז 'אש החסידות'.
די ספר תורה וועלכע איז נתנדב געווארן דורך הרה"ח הישיש ר' מיימון אביטל שיחי', ואתו עמו עטליכע נדיבי הלב חברי וידידי קהל בני היכלא, איז ארויס פון שטוב פונעם רב הקהלה הגאון רבי משה רויטמאן שליט"א און איז געפירט געווארן בתופים ומחולות ברחובות קרי', מיט א זעלטענע שמחת התורה וועלכע האט ארומגענומען די גאנצע אומגעגענט. די גאנצע תהלוכה איז באגלייט געווארן דורך די טייערע ילדי תשב"ר וואס האבן געהאלטן פאקלען אין די הענט לכבודה של תורה.
דער נדבן ר' מיימון אביטל שיחי', איז געזעצט געווארן אין א קעניגליכע קאראטע צוגעבינדען צו ווייסע פערד, וועלכע איז בייגעשטייערט געווארן דורך הרב יחזקאל שושא שיחי', מחשובי תושבי השכונה, ארויסצוהייבן די געוואלדיגע כבוד התורה.
ביים מעמד האבן זיך באטייליגט אלע חשובי רבני העיר, צווישן זיי: כ"ק האדמו"ר מדזיקוב גבעת זאב שליט"א; כ"ק האדמו"ר מקאסאן שליט"א; הגה"צ גאב"ד חליסה שליט"א וועלכע איז געקומען צו פארן פון בני ברק, זיך משתתף צו זיין אין די שמחה פון זיין איידעם דער רב הקהילה; הגאון רבי דוד אהרן סופר שליט"א רב קהל 'משכן דוד אהרן'; הגאון רבי אהרן אלי' וועטנשטיין שליט"א דומ"ץ בעלזא; הגאון רבי ברוך זאב פדר שליט"א דומ"ץ בעלזא; הרה"צ רבי ישראל חיים שוחט שליט"א בן כ"ק האדמו"ר מקארלין סטולין שליט"א; און הרה"ג ר' דוד רוקח שליט"א נכד כ"ק מרן האדמו"ר מבעלזא שליט"א וואס איז מכובד געווארן פארצוזאגן די מזמורים.
נאך די ריקודין עילאין איז פארגעקומען די עלעגאנטע סעודה לגומרה של תורה אינעם היכל הביהמ"ד. במשך די סעודה האט אויפגעטראטן מיט פאסיגע ווערטער, הרה"ח ר' אורי בלוי שליט"א, וועלכע האט ארויסגעברענגט ווי די ביהמ"ד איז געווארן א תל תלפיות און לייכט טורעם פאר די גאנצע אומגעגענט, שטייענדיג בלויז דריי יאר זינט איר גרינדונג, און ווי די קהלה וואקסט און בליהט לשם ולתפארת תחת נשיאתו פונעם חשובן רב שליט"א וועלכע איז משפיע מלוא חפניים אויף די חברי הקהילה און מתפללי הביהמ"ד, ספעציעלע מיט די בארימטע שיעורים בתורת החסידות און זיין איבערגעגעבנקייט פארן יעדן יחיד פון די קהלה.
מיטן בענטשן איז מכובד געווארן דער געטרייער גבאי הביהמ"ד הרה"ח ר' שלום יוסף גליק שליט"א. צום קלימאקס האט מען געהערט די דברי תורה וברכה פונעם רב שליט"א, וועלכע ארומגערעדט איבער די גרויסקייט פון א הכנסת ספר תורה אין די ימי הרחמים והרצון, און באזונדער באדאנקט אלע עוסקים און מסייעים צו דעם מעמד הנשגב, ובראשם העסקן הרב שמעון בוקסבוים שיחי'.
