זונטאג פ' פנחס • י"ז תמוז תשפ"ה | בחצרות הקודש
בילדער קרעדיט: שלומי טריכטר
א שיינעם מעמד התמנות איז די וואך פארגעקומען בעיר הקודש ירושלים, וואו עס איז אויפגענומען געווארן א נייער דיין ומורה צדק מטעם העדה החרדית אין שכונת מקור ברוך אין ירושלים, הלא הוא הגה"צ רבי יעקב שלמה כהנא שליט"א אדמו"ר מזידיטשוב ספינקא.
דער דיין הגה"צ רבי יעקב שלמה שליט"א איז שוין יאהרן פקיע שמיה מיט זיין גדול בתורה והוראה, מיט צעהן יאהר צוריק איז ער אויפגענימען געווארן אלס ממלא מקום פון זיין פאטער כ"ק אדמו"ר רבי צבי הירש כהנא זצ"ל, און טוט ווייטער אנפירן דעם שיינעם ביהמ"ד זידיטשוב ספינקא אין שכונת מקור ברוך, באזונדער דינט ער אלס מורה ודאין פאר פילע תושבי השכונה און איז משיב לפני השואלים בדבר הלכה. אצינד איז ער עמטליך נתעטר געווארן אלס דיין ומורה צדק מטעם העדה החרדית בעיר השם שמה, זייענדיג ראוי לאותו איצטלא לדון ולהורות.
זיין התמנות אלס דיין אין די עדה החרדית טראגט א ספעציעלן באדייט זייענדיג אן אייניקל פון כ"ק אדמו"ר מטשאקאווא זצ"ל בעל דברי נפתלי וואס איז געווען מפארי הרבנים אינעם בית דין הגדול שבירושלים, און האט צענדליגער יאהרן געדינט אלס יושב ראש ועד הכשרות פון די עדה החרדית, דעריבער כי לו נאה כי לו יאה אז זיינס אן אייניקל ווערט אויפגענומען אלס דיין ומורה צדק אינעם בית דין העדה החרדית.
די מעמד התמנות איז פארגעקומען די וואך דינסטאג אין ביהמ"ד זידיטשוב ספינקא אין ירושלים, בשילוב מיטן סעודת הילולא לכבוד די יארצייט פון הרה"ק בעל עטרת צבי מזידיטשוב זי"ע, ביי וועלכן עס האבן אנטייל גענומען טייל פון די חברי בד"ץ העדה החרדית און די רבני השכונה.
