פרייטאג פ' ואתחנן • י"ב אב תשפ"ד | בחצרות הקודש
באיאנער חסידים גרייטן זיך מיט התרגשות אין עקסטאז מיטצוהאלטן די געהויבענע ימי השמחה בבית המלוכה, די שמחת הנישואין פון א אייניקל ביי רבם ומאורם כ"ק אדמו"ר מבאיאן שליט"א וואס וועט אפגעראכטן ווערן קומענדיגן מאנטיג ראה כ"ב אב ברוב פאר והדר במקהלות אלפי חסידי באיאן וחסידים ברנה יגילו אויף גאר א געהויבענעם פארנעם אינעם גרויסן ביהמ"ד בית וויזניץ אין שטאט בני ברק. בשעה טובה ומוצלחת וועט גיין אונטער די חופה בשטו"מ החתן זוהן פון כ"ק אדמו"ר מזידיטשוב שיקאגא שליט"א חתנא דבי נשיאה פון כ"ק אדמו"ר מבאיאן שליט"א, מיט די כלה א טאכטער פון הרה"ג ר' יעקב שמשון ארנסטר שליט"א זון פון הגה"צ רבי מנחם ארנסטר ראש ישיבת וויזניץ און איידעם ביי הגה"צ רבי מאיר כץ ראש כולל עיון רמת וויזניץ חיפה איידעם ביי הגה"צ ראש ישיבת סערט ויז'ניץ בעל 'ברכת משה' זכר צדיק לברכה.
די שמחה טראגט א ספעציעלע באדייט ביי פילע חסידים ואנשי מעשה, זייענדיג א מסיבה שצדיקים ותלמידי חכמים מסובין בה, ווען עס וועלן מפאר זיין בראש השמחה די ראשי בית אב די זיידע כ"ק אדמו"ר מבאיאן שליט"א, און די געהויבענע פעטער מצד הכלה מרן אדמו"ר מוויזניץ שליט"א, ווען טויזנטער אידן חסידים ואנשי מעשה וועלן זיך מיטפרייען תחת קורת גג אחד בשמחת בית צדיקים. באזונדער רופט ארויס די חתונה אינערליכע רגשי הלב ביים ציבור עדת חסידי באיאן זקנים עם נערים, נאך אונטערן רושם, בלויז געציילטע וואכן נאך ווען מען האט זיך מיטגעפריידט מריחוק מקום ביי די ימי השמחה פונעם אייניקל ביים רבין שליט"א וואס איז געפראוועט געווארן פארלאפענעם חודש תמוז אין שטאט לאנדאן, וועט יעצט ווידער זיין א געלעגענהייט פאַר'ן ציבור מיטצולעבן מקירוב מקום א שמחה אינעם הויף און מיטצוהאלטן דעם פרייליכן מאמענט, ווען די רבי שליט"א מאכט חתונה די דריטע אייניקל בשעה טובה ומוצלחת.
די קייט פון ימי שמחה ואורה וועט זיך אנצוהייבן ביים גרויסן שבת עלי' לתורה, קומענדיגן שבת פרשת עקב, אין די גרויסע באיאנער קלויז אין ירושלים עיה"ק אויף רחוב מלכי ישראל, דער רבי שליט"א וועט פרייטיג צונאכטס נאכן דאווענען קידוש מאכן על הכוס ברוב עם. שבת אינדערפרי וועט פארקומען די מעמד הבאגלייטן פונעם רבינס שטוב ביז צום גרויסן קלויז. נאכן באווארפן וועט פארקומען די קידושא רבא אינעם גרויסן קלויז, און שפעטער נאכמיטאג וועט דער רבי פראווענען א טיש שלש סעודות, מוצאי שבת נאך הבדלה וועט געפראוועט ווערן די שמחת הפארשפיל בתופים ובמחולות.
מאנטאג פרשת ראה וועט געפראוועט ווערן די שמחת החתונה בשמחה ובחדוה, אין בית מדרש הגדול אין קרית וויזניץ בני ברק, וואס וועט זיך פארציען פאר לאנגע שעה'ן בקול צהלה ורינה ובהמון חוגג. מיטוואך דערויף וועט פארקומען א גרויסע שמחת השבע ברכות אינעם היכל הקלויז הגדול אין ירושלים געווידמעט פאר די בחורי החסידות אינאיינעם מיטן פתיחת הזמן בהיכלי הישיבות הקדושות. די שמחה אנטשפרעכט צו זיין גאר געהויבן, אויף וואס חסידי באיאן קוקן ארויס מיט גרויס ערווארטונג און התרגשות!
