דינסטאג פ' נצבים • כ"ג אלול תשפ"ה | בחצרות הקודש
בילדער קרעדיט: שוקי לרר
אין א שמחה'דיגע שטימונג איז געפראוועט געווארן די שיינע רבישע שמחה אין די הויפן פון קוידינוב – נאראל – מערב בני ברק, ביי די שמחת החתונה פון החתן ני"ו בן כ"ק אדמו"ר מקוידינוב שליט"א חתנא דבי נשיאה כ"ק אדמו"ר מנאראל שליט"א מיט די כלה אן אייניקל פון הגאון הגדול רבי שמואל אליעזר שטערן שליט"א גאב"ד מערב בני ברק, א טאכטער ביי זיין זוהן הרה"ג ר' דניאל שטערן שליט"א איידעם ביי הרה"ג ר' יעקב שמשון יאקאבאוויטש שליט"א מגארליץ.
די שמחה איז געפראוועט געווארן בשמחה וגיל אין די זאלן פון היכלי מלכות אין בני ברק, וואו עס האבן זיך מיטגעפריידט א קולירפולע ציבור חסידים ומעריצים פון אלע הויפן, וחסידים ברינה יגילו.
ביים מעמד החופה איז מכובד געווארן מיט סידור קידושין דער זיידע כ"ק אדמו"ר מנאראל שליט"א, קריאת הכתובה הרה"ג ר' ברוך גוטמאן שליט"א דיין אין ק"ק קוידינוב, מיט די ברכות ראשונות האט מען מכבד געוועהן די זיידע הרה"ג ר' יעקב שמשון יאקאבאוויטש שליט"א, הגה"צ רבי יהושע רובין אבד"ק טאמאשוב בני ברק א מחותן מצד החתן, הרה"צ ר' יעקב זילבערפארב שליט"א מקוידינוב, און ברכה אחריתה די זיידע הגאון רבי שמואל אליעזר שטערן שליט"א גאב"ד מערב בני ברק.
די חופה האט פארגעזעצט מיטן סעודת מצוה ביי וועלכן די אדמור"ים שליט"א האבן מפאר געוועהן בראש השמחה און אויפגענומען די רבנים און געסט. צווישן די אדמור"ים וועלכע האבן זיך משתתף געוועהן דורכאויס די שמחה זענען געוועהן האדמור"ים מסאסוב, שבט הלוי, לעלוב בראנוביץ, זידיטשוב, לייפניק און נאך.
ביי די חתונה האט ספעציעל ארויסגעשיינט צווישן די געסט פילע אידן תושבי ויוצאי פראנקרייך וואו דער מחותן דער קוידינובער רבי פארט כסדר אהין מחזק זיין די ארטיגע אידן און זיי נענטער ברענגען לאביהם שבשמים, ובראשם האט זיך משתתף געוועהן הגאון רבי אברהם ווייל שליט"א דער הויפט רב פון שטאט שטראסבורג אין פראנקרייך.
נאכן בענטשן האט דער בדחן ר' חנוך לאנדא הי"ו אויפגערופן די געהויבענער זיידע'ס און מחותנים צו די ריוקדין לפני הכלה, בראש וראשון די זיידע כ"ק אדמו"ר מנאראל שליט"א, דערנאך די זיידע הגאון רבי שמואל אליעזר שטערן שליט"א גאב"ד מערב בני ברק, און די זיידע הרה"ג ר' יעקב שמשון יאקאבאוויטש שליט"א, הרה"ג ר' יעקב שמשון יאקאבאוויטש שליט"א, און צום לעצט דער אבי החתן כ"ק אדמו"ר מקוידינוב שליט"א וועלכע האט דערביי אראפגעלייגט אן עבודה רבה כדרכו בקודש.
