מיטוואך פ' ראה • ג' אלול תשפ"ה | בחצרות הקודש
א מאסן שטראם פון גדולי ישראל, אדמור"ים רבנים וראשי ישיבות האבן די וואך געשטראמט צום שטוב פון שלוחי דרבנן העסקן הרב מאיר פרוש הי"ו אין ירושלים, צום שמחת הכנסת ספר תורה וואס ער האט געלאזט שרייבן לזכותו פון זיין זוהן הבחור נפתלי צבי פרוש הי"ו, א טייער נשמה מיט ספעציעלער געברויכן, די ספר תורה איז אריינגעגעבן געווארן זונטאג נאכמיטאג צום ביהמ"ד תורת מרדכי דחסידי וויזניץ אויף די שמגר גאס אין ירושלים, וואו ר' מאיר הי"ו איז מחשובי המתפללים.
די שמחה העצומה האט זיך אנגעהויבן זונטאג פארמיטאג, ווען עס איז פארגעקומען דער מעמד סיום כתיבת האותיות פונעם ספר תורה, אין שטוב פונעם בעל השמחה. צווישן דער ריזיגער ציבור גוטע פריינד און עסקנים ואישי ציבור פון אלע שיכטן און קרייזן, פונדערנאנט און פונדערווייטנס, איז געוועהן א באזונדער זכי' אז די גדולי האדמור"ים זענען ארויפגעקומען כדי איינשרייבן אותיות לגומרה של תורה, און דערביי איבערגעבן טייערע ברכות פארן בעל שמחה און אלע משתתפים.
צווישן אנדערע האבן זיך אנגעזעהן דורכאויס דעם מעמד, האדמור"ים מבאיאן, טשערנאביל, ביאלא, נדבורנה, פינסק קארלין, לעלוב, סקולען ירושלים, סטריקוב, תולדות יהודה, זוועהיל, באסטאן, באסטאן ביתר, ברעזאן, האדמו"ר רבי רפאל אבוחצירא, המשגיח הגאון רבי דן סגל, דער ראשון לציון הגאון רבי דוד יוסף שליט"א, הגה"צ רבי יוסף משה דוב הלברשטאם רב חסידי צאנז אין אמעריקא בשליחות אביו האדמו"ר מצאנז, הרה"צ רבי יוחנן שוחט רב דחסידי קארלין סטאלין אין ביתר בשליחות אביו האדמו"ר מקארלין סטאלין, הגה"צ רבי ישראל ברזובסקי אבד"ק סלונים ביתר בשליחות אביו האדמו"ר מסלונים, הרה"צ רבי שלום צבי סופר בשליחות אביו האדמו"ר מערלוי, הרה"צ רבי שלום עוזר האגער בשליחות אביו האדמו"ר מסערט וויזניץ, הרה"צ רבי נחמן בידערמאן מלעלוב, הגה"צ רבי יעקב ישראל מייזליש אבד"ק קרית באבוב, הגה"צ רבי דוד טווערסקי אבד"ק ראחמיסטריווקא, הגאון רבי יעקב יהושע ענגלענדער ראש ישיבת מחנובקא בעלזא, הרה"צ רבי אהרן דוד ראזנבוים מנדבורנה, און נאך פיל.
שפעטער נאכמיטאג איז ערשינען כ"ק אדמו"ר מוויזניץ בית שמש שליט"א וועלכע האט אריינגעשריבן די לעצטע אותיות, און דערנאך אפגעראכטן א שולחן לחיים און ארויסגעפירט דעם ספר תורה לרחובה של עיר. דער רבי האט באגלייט די תהלוכה ביז צום ביהמ"ד וואו דער רבי האט אפגעראכטן די הקפות אויפן שטח פארנט פון ביהמ"ד "תורת מרדכי", תחת כיפת השמים, באזונדער האט זיך דער רבי שליט"א ארויסגעלאזט אין א ריקוד מיט נדבת הספר תורה ר' מאיר און זיין זוהן דער בעל שמחה. דער רבי שליט"א האט שפעטער באשיינט ביים סעודת מצוה לגומרה של תורה און משמיע געוועהן דברות קודש לכבוד העם הנאספים.
