זונטאג פ' פנחס • י"ז תמוז תשפ"ה | בחצרות הקודש
בילדער קרעדיט: שוקי לרר
דעם ערב שבת קודש ט״ו תמוז איז אפגעצייכנט געווארן די הילולא קדישא פון הרה״ק המפורסם, פועל ישועות בקרב הארץ, רבי דוד משה מקרעטשניף זי״ע וואס איז נערץ ונקדש אין אלע חסיד׳ישע קרייזן. אומעטום האט מען מעלה געווען זכרונו הבהיר וצדיק מה פעל, בפרט איז די הילולא קדישא פארביי מיט רגשי עילאה אינעם אתרא דמר בצל בנו הגדול וממלא מקומו, כ״ק אדמו״ר מקרעטשניף שליט״א, אין קרית קרעטשניף, רחובות – אין דעם הייליגן בית מדרש וואס דער בעל ההילולא זי״ע האט אליין אויפגעשטעלט בדמים תרתי משמע – און דארטן אפגעראכטן זיין עבודת הקודש בסילודין, און משפיע געוועהן ישועות ורפואות פאר אידישע קינדער.
בפניא דמעלי יומא – דאנערשטאג נאכמיטאג – איז דער רבי שליט״א ארויף בראש קהל חסידיו צום אוהל הקדוש, אינעם בית החיים אין רחובות, פוקד זיין דעם ציון הק׳, און אויספוילן ישועות ורפואות בזכותו של אותו צדיק. דער רבי שליט״א האט פארגעזאגט ספר רביעי אין תהילים מיט גרויס השתפכות הנפש, דערנאך געזאגט קדיש און זיך משתטח געווען אויפן ציון המצוינת להפקד בדבר ישועה ורחמים.
ווען די נאכט פון הילולא איז צופאלן, איז שוין געווען צוגעגרייט פאר די הונדערטער חסידים די סעודת הילולא רבתי אין בנין בית המדרש הגדול. נאכדעם איז דער רבי שליט״א אריינגעקומען צום עריכת השולחן הטהור, זיך געוואשן צום סעודה, און מסיים געווען ש״ס – וואס איז געלערנט געווארן דורך כל קהלא קדישא לעילוי נשמתו הטהורה – און געזאגט קדיש דרבנן.
דערנאך האט דער רבי משמיע געוועהן דהרות קודש, און מרחיב געווען מיט ענינים נפלאים ממשנתו הטהורה פון זיין גרויסן טאטן, בעל ההילולא זי״ע. דערנאך האט דער רבי געבענטשט ברכת המזון על הכוס, געזאגט שבע ברכות לכבוד עטליכע חתנים, און דערנאך איז דער ציבור דורך אל מול פני הקודש מיט קוויטלעך להזכר לטובה בהאי יומא רבה. נאכן טיש האט דער רבי שליט״א געדאווענט מעריב פארן עמוד לרגל די הילולא קדישא.
ביים טיש האבן זיך משתתף געוועןן דעם רבינ׳ס שוואגער, כ״ק אדמו״ר מסאסוב שליט״א, חדב״נ פונעם בעל ההילולא, כ״ק אדמו״ר מביטשקוב שליט"א, נכד בעל ההילולא, און כ״ק אדמו״ר מזידיטשוב-ווערצקי שליט״א.
