זונטאג פ' בהעלתך • י"ב סיון תשפ"ה | בחצרות הקודש
טויזנטער בני תורה תלמידי ישיבת פונוביז, האבן זיך פאריגן דינסטאג אסרו חג שבועות אין ארץ ישראל מיטגעפריידט מיט די גרויסארטיגע מעמד 'הכנסת ספר תורה' וועלכע איז אריינגעגעבן געווארן צום היכל הישיבה, לזכרו פונעם אומפארגעסליכן ראש ישיבה הגאון האדיר רבי גרשון אדלשטיין זצ"ל וואס איז געשריבן געווארן בהידור רב דורך זיינע טויזנטער תלמידים הקרובים והרחוקים.
די יעצטיגע מעמד 'הכנסת ספר תורה' האט אויסגערופן גרויס התרגשות ביי די תלמידי הישיבה, נאך גאנצע זיבעצן יאר וואס ס'איז נישט אפגעראכטן געווארן אזא מעמד בהיכל הישיבה. די ספר תורה האט מען אנגעהויבן שרייבן ביים מעמד נעילת החג פארלאפאנעם מוצאי שמחת תורה און אצינד שטייענדיג ערב די יומא דהילולא פונעם ראש הישיבה, אין דעם זמן גרמא פון קבלת התורה האט מען מכניס געוועהן דעם ספר תורה ברוב התרגשות ושמחת התורה. אין אן ערשטמאליגן שריט, איז די סעודה לגומרה של תורה, אפגעראכטן געווארן "איידער" די מעמד הכנסת ספר תורה, נאך די דירעקטע הוראה פון די ראשי הישיבה, כדי נישט גורם צו זיין ביטול תורה און נישט צושטערן דעם נאכט סדר אין ישיבה.
די מעמד סיום כתיבת האותיות איז פארגעקומען אין שטוב פונעם ראש ישיבה זצ"ל אויף רחוב ראב"ד אין בני בר און די תהלוכה איז ארויס פון שטוב פון הגאון רבי אליעזר כהנמן שליט"א נשיא הישיבה. טויזענטער אינגעלייט און בחורים, תלמידים פון אלע יאהרגענג האבן שווארץ געמאכט די גאסן פון בני ברק און באגלייט די ספר תורה ברחובות קריה מיט טענץ און געזאנג, ווען צום קלימאקס האט דער ראש ישיבה הגאון רבי ברוך דוב פוברסקי שליט"א איבערגענומען די ספר תורה מיט טרערן פון התרגשות און געטאנצן מיטן ספר זינצנדיג אין קאר מפאת חולשתו.
אנקומענדיג צום ככר הישיבה האבן די בחורי הישיבה ממשיך געווען מיט די ריקודין און אזוי אריינגעפירט דעם ספר תורה צום נאסטאלגישן ארון הקודש אין די ישיבה. דערנאך האבן די רבני הישיבה פארגעזאגט די מזמורים כנהוג.
