זונטאג פ' במדבר • כ"ז אייר תשפ"ה | בחצרות הקודש
בילדער קרעדיט: א. אייזנבאך
דעם שבת קודש – ספירת יסוד שביסוד איז אויסגעפאלן די 80 'סטע יארצייט שנת היסוד פונעם מופת הדור והדרו ופועל ישועות בקרב הארץ הרב הקדוש רבי שלמה'קע זוועהילער זי"ע, וועלכער איז נסתלק געווארן אין ירושלים
כ"ו אייר תש"ה, ומנוחתו כבוד אויפ'ן הר הזיתים אין ירושלים.
לרגל די הילולא קדישא האבן מאסן אידן געשטראמט שוין אנגעהויבן פון דאנערשטאג פוקד זיין דעם ציון הקדוש במרומי הר הזיתים, וואס ווי באוואוסט, איז אין לויף פון די לעצטע יארן אנטשטאנען א שטארקע התעוררות ביים ציבור אין ארץ ישראל איבער פארשידענארטיגע סגולות און סיפורי מופת, ארום דעם ציון הק', וואו הונדערטער אידן זענען שוין געהאלפן געווארן בזכותו הגדול.
ספעציעל איז געפראועט געווארן די הילולא קדישא בצל הקודש פון נכדו ממשיך דרכו בקודש דור אחר דור כ"ק אדמו"ר מזוועהיל שליט"א, אנגעהויבן דאנערשטאג אויפדערנאכט ווען די רבי שליט"א איז ארויף מיט הונדערטער חסידים צום ציון הק' להפקד בדבר ישועה ורחמים. נאכן עליה לציון איז די רבי אנגעקומען צום נאסטאלגישן הויז ביתו נאווה קודש פונעם בעל ההילולא רבי שלומה'קע זי"ע אין שכונת בית ישראל צווישן די פיר ווענט וואס זענען אנגעזאפט מיט זיין אויסטערלישע עבודה, די רבי האט דארט אפגעראכטן א שולחן לחיים און משמיע געווען דברות קודש בגודל קדושת המקום.
שפעטער איז פארגעקומען א גרויסע כינוס חיזוק והתבוננות במשנתו הטהורה מיוחד פאר די בחורי החסידות, אין ביהמ"ד הגדול זוועהיל אין די בית ישראל געגענט סמוך ונראה צו ביתו נאווה קודש פונעם צדיק, ווי די רבי שליט"א האט משמיע געווען דברות קודש, און עס איז געהערט געווארן א דרשה פון פה מפיק מרגליות הרב דוד קלעצקין שליט"א ווי מען האט זיך מחזק געווען בעניני אמונה און קדושה במשנתו הטהורה.
שבת קודש בעיצומו של יום ההילולא איז געווען א זמן קהילה לכל פאר חסידי זוועהיל וואס זענען געקומען צופארן מכל מקומות מושבותיהם צו פראווענען די יארצייט במקום מגוריו פונעם זוועהילער רבי'ן שליט"א אין שטאט ביתר. די רבי האט אפגעראכטן די תפילות און טישן אויף א געהויבענעם שטייגער, און דורכאויס שבת משמיע געווען אמרות טהורות במשנתו של צדיק, און דערציילט עובדות וסיפורים פונעם גרויסן בעל ההילולא. די סעודות שבת האט די גאנצע ציבור געגעסן בצוותא חדא, און בצפרא דשבתא איז אפגעראכטן געווארן א קידושא רבא ברוב עם, ווי עס האט אויפגעטרעטן הרב שלמה גאלדמאן זון פון הגה"צ רבי שמואל דוד גאלדמאן גאב"ד זוועהיל מיט סיפורים ועובדות נפלאים.
