מאנטאג פ' אחרי קדושים • ז' אייר תשפ"ה | בחצרות הקודש
תושבי לאס-אנדזשעלעס גרייטן זיך צו ענטפאנגען בכבוד דעם גרויסן גאסט, כ"ק אדמו"ר מקאשוי שליט"א, וועלכער וועט אפשטאטן א געהויבענעם ביקור קודש אין שטאט, להשקות את הצמאים די ארטיגע חסידישע קהילה קדושה וואס האט פארבעטן דעם רבי'ן שליט"א אריינצובלאזן א חיות דקדושה, מיט דעם געהויבענעם באזוך אין די שטאט און מוסדות והיכלי התורה, אויפצוטרעטן מיט דברות קודש חיזוק והדרכה אין די געהויבענע ימי הספירה.
די דאזיגע נסיעה ציעט שטריכן און איז א המשכה פון די אומפארגעסליכע נסיעות פון אביו הגדול כ"ק אדמו"ר מקאשוי זצ"ל בעל ברכות שמים, וואס פלעגט אפט באזוכן אין שטאט, און איבערלאזן הויפענעס חיזוק און התרוממות הנפש אויף א לאנגע צייט. שפעטער נאך זיין הסתלקות לחיי עולם הבא בשנת תשס"ה לפ"ק איז דאס פארגעזעצט געווארן דורך בנו וממלא מקומו בקודש כ"ק אדמו"ר בעל שיח חיים זצ"ל. אצינד וועט יבלחט"א דער רבי שליט"א, -וועלכע האלט א שטענדיגן קשר חזק מיט די תושבי המקום- פארזעצן די מסורת אבות, און מחזק זיין די מוסדות התורה ותושבי העיר, מיט דרשות חיזוק, און מעמדים נהדרים וביקורי קודש ביי רבני העיר שליט"א.
די רבי וועט בעז"ה אנקומען אין שטאט היינטיגן דאנערשטאג אחרי קדושים אין די נאכמיטאג שעות. די אכסניא של כבוד וועט זיין בבית הרבני הנגיד ר' אפרים שמואל דויטש הי"ו בן הרבני הנגיד הרה"ח ר' רפאל משה יוסף שליט"א, וואס האט נאך געהאט די זכי' מכניס אורח צו זיין כ"ק אדמו"ר בעל השיח חיים זצ"ל.
די ימי ביקור הקודש וועלן זיין פון דאנערשטאג מיטאג ביז דינסטאג מיטאג. ווען במשך די צייט וועט פארקומען פארשידענע מעמדי חיזוק וכבוד התורה. אנגעהויבן ביי דעם מעמד קבלת פנים דאנערשטאג אויפדערנאכט בבית הרבני הנגיד הרה"ח ר' רפאל משה יוסף דויטש שליט"א. און דערנאך דעם שבת קודש נועם הנשמות, ווי די תפילות ושלחנות הטהורות און שלש סעודות וועט געפראוועט ווערן ברוב עם הדרת מלך אין די חסידישע כולל 'היכל יחיאל יהודה'. באזונדער וועט דער רבי משמיע זיין א הערליכע דרשת פרקי אבות, געפלאכטן מיט דברי דרוש ואגדה, מוסר והתחזקות. מוצאי שבת קודש וועט דער רבי שליט"א אפרעכטן דעם שולחן הטהור ברבים לכבוד סעודת מלוה מלכה.
דורכאויס זונטאג און מאנטאג וועט זיין קבלת קהל, פאר תושבי העיר, ווי אויך קלענערע מסיבות של מצוה למען החזקת הישיבה הק', ווי תושבי העיר וועלן האבן די געלעגנהייט זיך אנצושליסן מיט סכומים אדירים און ווערן א שותף מיט דעם רועה נאמן אין די החזקת המוסדות.
באזונדער וועט פארקומען א געהויבענע שולחן הטהור לרגל פסח שני, בבית הרבני הנגיד התורני הרב רבי בערל ווייס שליט"א, ווי עס וועט זיין א געלעגנהייט פאר תושבי ורבני העיר בכלל, און די נגידים החשובים בפרט, מיטצוהאלטן א מעין פונעם יום טוב פסח בצל הקודש, און זיך מתבשם זיין מיט דברי תורה והתרוממות הנפש לכבוד היום.
דורכאויס די צייט וועט דער רבי שליט"א משמיע זיין מדברותיו הנעימים, מיט דברי הכנה וחיזוק צום יום טוב שבועות הבעל"ט. ביז דינסטאג מיטאג ווען דער רבי וועט פארלאזן די שטאט אויפ'ן וועג אהיים לביתו נאוה קודש. איבערלאזנדיג א רישומא דקדושה אויף א לענגערע תקופה ביי תושבי העיר.
